Meşə Eco Village – Ailəvi Haykinq

Forest School Azerbaijan tərəfindən təşkil olunan növbəti ailəvi təbiət yürüşü çərçivəsində uşaqlar və valideynlər birlikdə Lənkəranın Daştatük kəndinə unudulmaz bir macəra səfərinə çıxıblar. Bu təcrübə iştirakçılara təbiətlə daha dərin bağ qurmaq və açıq havada öyrənmə imkanları yaratmaq məqsədi daşıyıb.

Ekspedisiya zamanı iştirakçılar yol boyu Biləsuvar rayonu ərazisində yerləşən Mahmudçala su bataqlıq gölü ərazisində, həmçinin Hirkan Milli Parkının Xanbulan gölü ətrafında köçəri quşları müşahidə edərək regionun zəngin biomüxtəlifliyi ilə tanış olublar. Daha sonra Daştatük kəndində kənd evləri, Hirkan meşələrinin əhatəsində təxminən 4–5 km məsafədə yürüş həyata keçirilib və kəndin daxilində müxtəlif təbiət hadisələri müşahidə olunub.

Proqram çərçivəsində iştirakçılar yerli icma üzvləri ilə birlikdə təbiətin kəşfinə çıxaraq müxtəlif bitki növləri və canlılarla yaxından tanış olublar. Bununla yanaşı kənd ərazisində yerləşən “Meşə Eko Kənd”-in fəaliyyət prinsipləri və davamlı yaşayış yanaşması iştirakçılara təqdim olunub.

Bu ekoloji və ailəvi təbiət yürüyüşü – haykinq təcrübəsi iştirakçılara yalnız fiziki aktivlik deyil, eyni zamanda təbiətlə bağ qurmaq, birlikdə öyrənmək və keyfiyyətli vaxt keçirmək imkanı yaratdı. Forest School Azerbaijan bu kimi təşəbbüslərlə təbiət əsaslı öyrənməni təşviq etməyə və ailələri açıq hava təcrübələrinə cəlb etməyə davam edir.